Պրոֆեսիոնալ բռնցքամարտի գերմիջինքաշային կարգում
WBC-ի վարկածով աշխարհի նախկին չեմպիոն Կառլ Ֆրոչի հայտարարության
համաձայն` Արթուր Աբրահամի հետ մենամարտը կարող է հետաձգվել և սեպտեմբերի
18-ի փոխարեն կայանալ հոկտեմբերի 2-ին:
Հիշեցնենք, որ բռնցքամարտիկները տարաձայնություններ ունեն` կապված
մարտի անցկացման վայրի հետ: Ֆրոչը ցանկանում է, որ այն կայանա
Նոթինգհեմում (Մեծ Բրիտանիա), Ամերիկայում կամ Կանադայում, իսկ Արթուր
Աբրահամի թիմը հանդես էր գալիս Գերմանիայում կամ եվրոպական որևէ այլ
երկրում մենամարտի կազմակերպման օգտին:
«Սա գումարի համար մենամարտ չէ: Իմ կարիերայի ներկա փուլում գումարները
նշանակություն չունեն: Խոսքն աշխարհի չեմպիոնի կոչումը վերադարձնելու,
գոտիների միավորման և գերմիջինքաշային կարգում իմ ժառանգության ամրապնդման
մասին է: Ուստի եթե ինձ ստիպեն մենամարտել Գերմանիայում, ես հաղթելու ոչ
մի հնարավորություն չեմ ունենա` նկատի ունենալով, թե ինչ տեղի ունեցավ
Կեսլերի հետ Դանիայում կայացած մենամարտում: Լսել եմ, որ մենամարտը կարող
է կազմակերպվել Մոնակոյում, Գերմանիայում, Հունգարիայում կամ Ֆրանսիայում:
Սակայն Աբրահամը պետք է մոռանա այդ տարբերակների մասին»,- Ֆրոչի խոսքերը
մեջբերել է «Nottingham Post»-ը:
