Հայ պրոֆեսիոնալ բռնցքամարտիկ Արթուր Աբրահամի մարզիչ Ուլի Վեգները կասկած է հայտնել, որ «Super Six» գերմրցաշարի երկրորդ տուրում իր սանի մրցակիցը` ամերիկացի Անդրե Դիրրելը, վնասվածք ունի: Ինչպես հայտնի է, այդ մենամարտը, որը պետք է կայանար մարտի 6-ին, Դիրրելի խնդրանքով հետաձգվել է և պետք է տեղի ունենա մարտի 27-ին: Վեգները կարծում է, որ դա միտումնավոր քայլ է:

«Նա որտեղի՞ց գիտի, որ մարտի 27-ին 100 տոկոսով պատրաստ կլինի,- ասել է մարզիչը «Bild» թերթի թղթակցին:- Սովորաբար, երբ մարդը վնասվածք է ստանում, չի կարող ճշգրիտ ասել, թե երբ լիարժեք ապաքինված կլինի: Ես կարծում, եմ, որ Դիրրելի շտաբը մեզ հետ «խելքի խաղ» է խաղում: Բայց դա նրանց ոչ մի առավելություն չի տա»:

Վեգներին կարելի է, իհարկե, հասկանալ, քանի որ մենամարտի հետաձգման պատճառով նրա համար խաղացանկի առումով բարդ իրավիճակ է առաջացել: Մարտի 13-ին նրա մեկ այլ սանը` Մարկո Հուկը, մենամարտ կանցկացնի Գերմանիայում: Մարզիչն ստիպված կլինի վերադառնալ Գերմանիա, իսկ այնուհետև կրկին մեկնել ԱՄՆ:

Aysor.am