Պրոֆեսիոնալ բռնցքամարտի թեթևքաշային կարգում WBO-ի վարկածով աշխարհի նախկին չեմպիոն Արթուր Գրիգորյանը հրաժարվել է ռինգ վերադառնալու մտքից: Նախկինում արևմտյան զանգվածային լրատվամիջոցներում լուրեր են հրապարակվել, որ Գրիգորյանը մտադիր է ռևանշ-մրցամարտ անցկացնել Մեթ Զեգանի հետ, ում միավորներով հաղթել է 2003 թ. հունվարին: Արթուրը հաստատել է, որ նախապատրաստվում էր այդ մենամարտին, սակայն ֆիզիկական նախկին մարզավիճակը վերականգնելու անհնարինության պատճառով ստիպված է եղել հրաժարվել վերադառնալու մտքից:

«Ես մոտ մեկ ամիս պատրաստվում էի: Բայց մարմինս իմ առջև կարմիր լույս է վառում: Այլևս չեմ կարող վերադառնալ նախկին մարզավիճակին: Ուղեղս ինձ մղում է դեպի ռինգ, իսկ մարմինս հրաժարվում է: Մարզումների ընթացքում չեմ կարողանում լավ մարզավիճակ ձեռք բերել և շատ էի հուզվել, որ կարող եմ նույնիսկ լուրջ վնասվածքներ ստանալ նախապատրաստության ընթացքում: «Universum»-ում աշխատում եմ որպես մարզիչ և պատասխանատու եմ իմ բռնցքամարտիկների համար: Ցանկանում եմ օգնել սաներիս, որպեսզի բարելավեն իրենց ցուցանիշները վարկանշային սանդղակներում», - Արթուր Գրիգորյանի խոսքերը մեջբերել է «Fightnews»-ը: