Ադրբեջանի բռնցքամարտի ֆեդերացիան և ԱԻԲԱ-ն պայմանագիր են ստորագրել` կապված Բաքվում տեղի ունենալիք աշխարհի պատանեական առաջնության հետ: Այս մասին հայտնում են ադրբեջանական լրատվամիջոցները:

Համաձայնագիրը ստորագրել են ԱԲՖ-ի նախագահ Քյամալէդդին Հեյդարովը և ԱԻԲԱ-ի նախագահ Չինգ Կուո Վուն: Վերջինիս խոսքերով` ԱԻԲԱ-ի նախագահի անվան մրցումներն ապացուցել են Ադրբեջանի ֆեդերացիայի կազմակերպչական բարձր ընդունակությունները:

«Նկատի ունենալով այդ հանգամանքը` մենք Բաքվին հնարավորություն տվեցինք կազմակերպել բռնցքամարտի աշխարհի պատանեական առաջնությունը: Ի դեպ, Ադրբեջանի մայրաքաղաքում կկայանան ոչ միայն ԱԻԲԱ-ի, այլև WSB-ի վարկածներով մրցաշարերը: Աշխարհի պատանեական առաջնությունը շատ մեծ նշանակություն կունենա, քանի որ այն վարկանշային է: Այստեղ խաղարկվելու են Սինգապուրում կայանալիք պատանեկան առաջին Օլիմպիական խաղերի ուղեգրերը»,- ավելացրել է Չինգ Կուո Վուն:

Նրա խոսքերով` Բաքվում կայանալիք աշխարհի երիտասարդական առաջնությունը պատմության մեջ ամենախոշոր իրադարձությունը կլինի: Մրցումներին, որոնք տեղի կունենան ապրիլի 23-ից մայիսի 1-ն ընկած ժամանակահատվածում, կմասնակցեն 106 երկրների 659 բռնցքամարտիկներ: Կիսաեզրափակիչ և եզրափակիչ մենամարտերն ուղիղ եթերում կհեռարձակվեն մասնակից բոլոր երկրներում:

Ավելացնենք, որ աշխարհի պատանեկան առաջնության արդյունքներով կորոշվեն Օլիմպիական խաղերի 44 ուղեգրերի տերերը: Մարզաձևի հայաստանյան ֆեդերացիան ուղեգրերի համար պայքարելու նպատակով նույնպես որոշում է կայացրել մասնակցել այդ առաջնությանը:

Aysor.am