2008 թ. Եվրոպայի չեմպիոն Էդիկ Համբարձումյանն այլևս բռնցքամարտի Հայաստանի ազգային հավաքականի կազմում հանդես չի գա: Նա առաջիկայում փորձելու է ամրապնդվել Ռուսաստանի հավաքականում:

Այս մարզիկին Սոչիից Հայաստան էր հրավիրել բռնցքամարտի ՀՀ հավաքականի գլխավոր մարզիչ, ԽՍՀՄ վաստակավոր մարզիչ Ռաֆայել Մեհրաբյանը և փորձառու մասնագետն անձամբ էր զբաղվում Համբարձումյանի մարզական վարպետության կատարելագործման հարցերով, նա նաև ստանձնել էր Էդիկի անձնական մարզչի պարտականությունը:

Ադյունքներն էլ շոշափելի էին: 2007թ. Չիկագոյում կայացած աշխարհի առաջնությունում Էդիկ Համբարձումյանը, զբաղեցնելով 5-րդ տեղը, մեր հավաքականի անդամներից առաջիններից մեկը օլիմպիական խաղերի ուղեգրի արժանացավ: Ընդ որում, օլիմպիական խաղերից առաջ մեր երկիր էր հրավիրվել նրա Ռուսաստանի մարզիչը' Վիկտոր Դիմիտրիադիսը: Վերջինս Հայաստանի պատվիրակության կազմում նաև օլիմպիական խաղերի մայրաքաղաք մեկնեց:

Ու թեև Էդիկը Պեկինի օլիմպիական խաղերում չկարողացավ դրսևորել իրեն, սակայն հետագայում քավեց մեղքը' դառնալով Եվրոպայի չեմպիոն, աչքի ընկավ նաև միջազգային մի շարք ներկայացուցչական ստուգատեսներում:

«90 րոպեի» ունեցած տեղեկություններով Էդիկի ազգությամբ ռուս կինը ցանկացել է ապրել իր հարազատ երկրում և Երևան տեղափոխվելու մտադրություն չի ունեցել:

Փաստն այն է, որ այժմ հայ մարզիկը վերջնականապես հեռացել է Հայաստնից և փորձելու է բախտ որոնել Ռուսաստանում: Ընդ որում, բռնցքամարտի Հայաստանի ֆեդերացիայի ներկայացուցիչները չեն ցանկացել որևէ խոչընդոտ ստեղծել և տեղեկացրել են Բռնցքամարտի միջազգային ֆեդերացիային, որ այդ հարցում ոչ մի առարկություն չունեն:

Չի բացառվում, որ խնդիրը նաեւ այն էր, որ Համբարձումային խոստացել էին  Երևանում բնակարան գնել, աակայն այդ հարցն այդպես էլ չլուծվեց: Բռնցքամարտի Հայաստանի ֆեդերացիան Համբարձումյանի համար բնակարան էր վարձակալել: Հետագայում էլ նրան առաջարկել էին մնալ Երևանի մարզական քոլեջի կացարանում: