Պրոֆեսիոնալ բռնցքամարտի երկրորդ միջինքաշային կարգում աշխարհի նախկին չեմպիոն Ջո Կալզագեն հայտարարել է կինոդերասանի դերում ուժերը փորձելու ցանկության մասին: Այս մասին տեղեկացնում է «The Scotsman»-ը:

2008 թ. բռնցքամարտիկի կարիերան ավարտելուց հետո Կալզագեն զբաղվել է պրոմոուտերական բիզնեսով, ինչպես նաև մասնակցել է բրիտանական հայտնի «Պարեր աստղերի հետ» հեռուստաշոուին: Սակայն վերջին ժամանակներս նա կարծես կորցրել է հետաքրքրությունը պրոմոուտերական գործունեության հանդեպ և որոշել է գնալ բրիտանացի հայտնի ֆուտբոլիստ Վիննի Ջոնսի հետքերով, ով մարզիկի կարիերան ավարտելուց հետո կինոդերասան դարձավ:

«Հնարավոր է` Ջոնսը ոչ Ալ Պաչինոն է, ոչ էլ Դե Նիրոն, բայց նա որոշակի հաջողությունների է հասել,- ասել է Կալզագեն:- Չեմ կարծում, թե կարող եմ «Օսկար» ստանալ, սակայն ի վիճակի եմ ֆիլմերից մեկում պինդ տղայի դեր կատարել: Ես այդպիսին եմ եղել իմ ողջ կարիերայի ընթացքում»:

Aysor.am